يعينك الله .... يا شارد عنة

[ماجد الزهراني]

الفرق بين المرأه في السنه الاولى من الزواج والسنه
العاشره او ما فوق

الساعه 6:30 صباحا
================
تودع زوجها وهو طالع للعمل وتقول له بتوحشني يا حبيبي


الساعه 11 صباحا
==============

تتصل عليه في العمل وتقول له حبيت اسمع صوتك بس يا
عمري

الساعه 3 العصر
=============

تستقبله بحرارة وهو داخل للبيت وتقول له الغدا جاهز يا حياتي ..تحب احطه لك الحين ؟

الساعه 5 العصر
=============

تصحيه من النوم بكلمات حنونة وتقول له اعمل لك شاي يا حبي ؟


الساعه 6 المغرب
===============

تسبل عيونها وتقول بكل خجل يا ريت يا حبيبي .. يعني
لو ما عليك كلافه .. يعني اذا تقدر توديني شوي لبيت اهلي
اذا كنت تقدر يا عمري و قبل ما ينطق بكلمه اذا ما
تقدر خلاص مو لازم وطبعا يضيع هو في نظره من عيونها
ويوديها لاهلها ولو انهم ساكنين في السويدي وهو ساكن في
العليا


الساعه 8 بالليل
=============

تتصل على الجوال وتقول اشتقت لك يا عمري .. يا ريت
تمرني ونروح للبيت وطبعا هو عارف وش بيجيه في البيت
فيطمر ويقول للشباب اسف والله يا شباب راسي مصدع ولازم
امشي


الساعه 10 بالليل
==============
تجلس وتقول الله يا حبي تتذكر ؟ تتذكر ايام الخطوبه لما كنت تعمل المستحيل عشان تشوفني ..وانا ياما
كذبت على ابوي وقلت له اني طالعه مع امي وانا اصلا
متفقه مع امي عشان اطلع معك وبعدها هات يا سوالف رقة وحنان لمده لا تقل عن ساعه

الساعه 11 بالليل
==============
الوصول الى هذه الصفحه غير مسموح ……….الخ



بعد مرور عشر سنوات
*******************

الساعه 6:30 صباحا
===============

هي في سابع نومه


الساعه 11 صباحا
==============
هي برضه في سابع نومه


الساعه 3 العصر
=============

تستقبله وهي نافخه خشتها وتقول شف لي حل مع ولدك علي
هذا ..حتى الان ما حل الولجب .. وسوير الله ياخذ عمرها
انشاء الله شاقه مريولها في المدرسه …عطني فلوس لازم
اروح اشتري لها واحد غيره … وصويلح يبي علبة هندسه تو
انه يقولي اليوم ان الاختبار صار بكره … وترى موضي
تكنفست مع الدرج وهي كانت في المشايه … والظاهر انها
تعورت …كله من هالشغاله الله يا خذها ….اسمع يا انا يا
هالشغاله في هالبيت ….ابيك اليوم تسفرها ما ابي اشوفها
وابيك بسرعه تقدم على وحده ثانيه ….وما ابيها تصير
حلوه …..يا ويلك لو صارت حلوه …..وبعدين شغالتي ابيك
تشرط عليها اذا سفرتها ما عاد تشتغل عند احد ….عشان ما
تقول اسرار بيتنا للناس الي تشتغل عندهم ما تدري ان
اسرار بيتهم كلها عند الجيران من لسانها هاللي وش طوله
و …و …..و

الساعة 5 العصر
=============

هي تفك هوشه بين سوير واخوها ويصحى هو على صوتها وهي
تهاوش وتدعي عليهم بجميع الامراض الخطيره الحديث منها
والقديم جعلكم للطاعون …جعلكم للحمى …جعلكم للوادي
المتصدع …جعلكم للحمى القلاعيه …والايدز..والجمرة الخبيثة ..الخ


الساعه 6 المغرب
===============

هو جالس يشرب الشاهي وهي تقول نبي نروح لامي بتجيهم
بنت خالة جد ولد عم ابوي ..وبعدين نبي نروح نشتري للبنت
مريول ..وبعدين بنت عمي والده ولازم اروح اشتري لهاهديه
من باتشي و ابي امر على المشغل ..وبعدين حطنا عند اختي
في الشفا من زمان ما شفناهم …………..
وفي هاللحظه فكر هو انه يشتغل ليموزين احسن له


الساعه 8 بالليل
==============

تتصل على الجوال وينك فيه ؟ وبعدين وين بتروح ؟ ومنهو

الي معك هذا ؟ ووش بتسون ؟ ومتى بتجي ؟ لا ما فيه
الساعه 11

تعال الساعه 10


الساعه 10 بالليل
==============


جالسين هي وياه عند التلفزيون ..اخيرا هدوء ..والعيال
نايمين ..والجو جميل ..وفجأه تطالعه وهي ماده بوزها
وتقول الحين امك وش عندها اليوم ما ترد يوم اني سلمت
هاه ؟ والله ما ادري كان سالتيها واختك وش
هالحركات الي مالها سنع …ليش عازمه الجيران وكل حريم
اخوانك الا انا ؟؟؟ لكن هين والله لاسوي عزيمه وما
اناديها …اصلا هي ما زارتني في المستشفى يوم اني ولدت
وانا فاهمه قصدها ..لكن هين ..والله لو تحب السما ما
نيب زايرتها اذا ولدت ……وبعدين بنات عمك وش عندهم
نافخين عمرهم ؟؟ على ايش ابي افهم ….على جمالهم الزايد اللهم لك الحمد بس تسكت شوي بعدين تقول وبعدين اختك نوره يوم انها تقول ان علي ولدي يشبهني ما يشبه ابوه وش قصدها هاه ملاحظه علي هو اشين اخوانهانا فاهمه قصدها
وتراها اذا ما بطلت هالحركات والغمز واللمز تراني
ابسمعها كلمتين واخليها تحترم نفسها …..لا وذاك اليوم
تقول اخوي محمد الي هو الزوج حلو مره و3 من حريم
الجيران قد خطبوه لبناتهم ….من زينك بس ما ادري وش
لاقين فيك . يسكت وما يرد , تسكت هي ثم تقول وبعدين اخوك
شاري لحرمته ساعه قيمتها عشرين الف ريال يرد طيب وش
المشكله ؟ وانا ليش ما تشتري لي ..والا انا مااستاهل .. ولو هي يعني احسن مني … بلاك ما شفتها ..شينه وطبايعها شينه وحتى طبخ ما تعرف تطبخ
خلاص اشتري لك ساعه
تعصب وتقول ايه تسكتني بهالكلام ….والله لانت
شاري ولا شي وش تبيني اقول يا بنت الحلال ؟ تقوم
وهي تبكي خلاص ما ابي منك شي


الساعه 11 بالليل
===============

هي زعلانه ونايمه مع العيال
وهو يلعن اليوم الي تزوج فيه




قصة ازلية تبدأ بحب وتنتهي بحب مهما حدث
معاني : الحب الاخير=حب الموووووت والانتقام



........... نقلتها من احد الاشخاص بعد اعجابي بها الصراحة .........

[احمد السريفي]

تسلم

فعلا تستاهل الاعجاب

[ماجد الزهراني]

الله يخليك

[أبو زياد الكناني]

بعد 15 سنه يطر عند المساجد


وبعد 16 كل واحد في بيت


وبعد 17 في المحكمة عشان الصرفية


وووووووووووووووووووووووو الله يعين

[عامر]

الأخ خالد :: بصراحة تصلح مخرج قصة وسيناريو .. أسلوب رائع .......
لكن يالربع ليس كل النساء بهذا الشكل وفكرة شهر العسل التي دخلت علينا هى من اجل هدم البيت الأسري . لذلك اصبح الان الوضع الحالي الذي ذكرت ياماجد بسبب الاعتقاد بمفهوم شهر العسل من زاوية قصيرة.
المؤمن التقي كل أيامه مع زوجته عسل حتى الفراق { والرسول صلى الله عليه وسلم يقول : خيركم خيركم لأهله ، وأنا خيركم لأهله } .
وهذا يدل على انه إمتداد الحياة بينهم يكون الود والحب والتعاون ليس يوم او ليلة او شهر وبعدها ماتسمع الى قصص لو انتجت في مجلدات كليلة ودمنه لم تكفيها.
أصلح الله الشأن للجميع ومشكور اخوي ماجد وتقبل خالص التحية . .

[الرائد]

الي بدايته حب نهايته شر والعكس صحيح بعدين عندي حل ما دام انها زعلانه على الشغاله يحط كل وحده في بيت ههههههههههه

[ماجد الزهراني]

انا قاعد انتضر تجارب الاعظاء المتزوجين وين هي


والا الخوف مسيطر الايام هذي على العالم :D :D :D :D :D

بدون تردد احكي وكلنا بنسمع بدون صوت