Unconfigured Ad Widget

Collapse

حال بعض المتزوجين

Collapse
X
  •  
  • الوقت
  • عرض
مسح الكل
new posts
  • ابو نوره
    عضو
    • Sep 2001
    • 87

    حال بعض المتزوجين

    السلام عليكم

    أنا داري أّذا قريت الموضوع ذا بتقول طيب وش أسوي اقولك سو زيي وشل الفكره من رااااااااااااااااااسك بالمره .........
    الفرق بين المرأه في السنه الاولى من الزواج والسنه العاشرة .
    السنه الاولى :

    تشيرالساعه الى 6:30 صباحا

    تودع زوجها وهو طالع للعمل وتقول له بالسلامه يا حبيبي

    الساعه 11 صباحا

    >تتصل عليه في العمل وتقول له حبيت اسمع صوتك بس يا

    عمري


    الساعه 3 العصر

    تستقبله وهو متشيكه وببتسامه حلوه وهو داخل للبيت وتقول له

    الغدا جاهز يا حياتي ..تحب احطه لك الحين ؟

    الساعه 5 العصر

    تصحيه من النوم بحنان ورفق وبتسامه طبعا (لازم) وتقول له اعمل لك شاي يا حبي ؟

    الساعه 6 المغرب

    تسبل عيونها وتقول بكل خجل يا ريت يا حبيبي .. يعني لو

    ما عليك كلافه .. يعني اذا تقدر توديني شوي لبيت اهلي اذا كنت تقدر يا عمري وقبل ما ينطق بكلمه ( اذا ما تقدر خلاص مو لازم ) وطبعا يضيع هو في نظره من عيونها

    ويوديها لاهلها ولو انهم ساكنين في السويدي وهو ساكن في العليا

    الساعه 8 بالليل

    تتصل على الجوال وتقول ( اشتقت لك يا عمري .. يا ريت تمرني ونروح للبيت ) وطبعا هو عارف وش بيجيه في البيت فيطمر ويقول للشباب اسف والله يا شباب راسي مصدع ولازم امشي

    الساعه 10 بالليل

    تجلس جنمبه وتقول ( الله يا حبي تتذكر ؟ تتذكر ايام الخطوبه لما كنت تعمل المستحيل عشان تشوفني ..وانا يا ما كذبت على ابوي وقلت له اني طالعه مع امي وانا اصلا متفقه مع امي عشان اطلع معك ) .. (الا الان تمااام)


    الساعه 11 بالليل

    الوصول الى هذه الصفحه غير مسموح

    بعد مرور عشر سنوات (نشوف وشلون بيصير الحال)


    الساعه 6:30 صباحا

    هي في سابع نومه

    الساعه 11 صباحا

    هي برضه في سابع نومه

    الساعه 3 العصر
    تستقبله وهي نافخه خشتها وتقول ( شف لي حل مع ولدك علي هذا ..حتى الان ما حل الواجب .. وسوير الله ياخذ عمرها انشاء الله شاقه مريولها في المدرسه …عطني فلوس لازم اروح اشتري لها واحد غيره … وصويلح يبي علبة هندسه تو انه يقول لي يوم ان الاختبار صار بكره … وترى موضي تكنفست مع الدرج وهي كانت في المشايه … والظاهر انها تعورت …كله من هالشغاله الله يا خذها ….اسمع يا انا يا هالشغاله في هالبيت ….ابيك اليوم تسفرها ما ابي اشوفها وابيك بسرعه تقدم على وحده ثانيه ….وما ابيها تصيرحلوه …..يا ويلك لو صارت حلوه …..وبعدين شغالتي ابيك تشرط عليها اذا سفرتها ما عاد تشتغل عند احد ….عشان ما تقول اسرار بيتنا للناس الي تشتغل عندهم ( ما تدري ان اسرار بيتهم كلها عند الجيران من لسانها هاللي وش طوله ) و …و …..و

    الساعة 5 العصر


    هي تفك هوشه بين سوير واخوها ويصحى هو على صوتها وهي تهاوش وتدعي عليهم بجميع الامراض الخطيره الحديث منها والقديم ( جعلكم للطاعون …جعلكم للحمى …جعلكم للوادي المتصدع …جعلكم للحمى القلاعيه …والايدز ..الخ )

    الساعه 6 المغرب

    هو جالس يشرب الشاهي وهي تقول ( نبي نروح لامي بتجيهم بنت خالة جد ولد عم ابوي ..وبعدين نبي نروح نشتري للبنت مريول ..وبعدين بنت عمي والده ولازم اروح اشتري لها هديه من باتشي و ابي امر على المشغل ..وبعدين حطنا عند اختي في الشفا من زمان ما شفناهم ………….. وفي هاللحظه فكر هو انه يشتغل ليموزين احسن له الساعه 8 بالليل

    تتصل على الجوال ( وينك فيه ؟ وبعدين وين بتروح ؟ ومنهو الي معك هذا ؟ ووش بتسون ؟ ومتى بتجي ؟ لا ما فيه الساعه تعال الساعه 10 )

    الساعه 10 بالليل

    جالسين هي وياه عند التلفزيون ..اخيرا هدوء ..والعيال نايمين ..والجو جميل ..وفجأه تطالعه وهي ماده بوزها وتقول ( الحين امك وش عندها اليوم ما ترد يوم اني سلمت ؟ هاه ؟ ) ( والله ما ادري كان سألتيها ) ( واختك وش هالحركات الي مالها سنع …ليش عازمه الجيران وكل حريم اخوانك الا انا ؟؟؟ لكن هين والله لاسوي عزيمه وما اناديها …اصلا هي ما زارتني في المستشفى يوم اني ولدت وانا فاهمه قصدها ..لكن هين ..والله لو تحب السما ما نيب زايرتها اذا ولدت ……وبعدين بنات عمك وش عندهم نافخين عمرهم ؟؟ على ايش ابي افهم ….على جمالهم الزايد اللهم لك الحمد بس ) تسكت شوي بعدين تقول ( وبعدين اختك نوره يوم انها تقول ان علي ولدي يشبهني ما يشبه ابوه وش قصدها هاه )

    ملاحظه : علي هو اشين اخوانه انا فاهمه قصدها وتراها اذا ما بطلت هالحركات والغمز واللمز تراني ابسمعها كلمتين واخليها تحترم نفسها …..لا وذاك اليوم تقول اخوي محمد ( الي هو الزوج ) حلو مره و3 من حريم الجيران قد خطبوه لبناتهم ….من زينك بس ما ادري وش لاقين فيك ) . يسكت وما يرد , تسكت هي ثم تقول ( وبعدين اخوك شاري لحرمته ساعه قيمتها عشرين الف ريال ) يرد ( طيب وش المشكله ؟ ) ( وانا ليش ما تشتري لي ..والا انا ما استاهل ..ولو هي يعني احسن مني … بلاك ما شفتها ..شينه وطبايعها شينه وحتى طبخ ما تعرف تطبخ ) ( خلاص اشتري لك ساعه ) تعصب وتقول ( ايه تسكتني بهالكلام ….والله لانت شاري ولا شي ) ( وش تبيني اقول يا بنت الحلال ؟ ) تقوم وهي تبكي خلاص ما ابي منك شي

    الساعه 11 بالليل

    هي زعلانه ونايمه مع العيال وهو يلعن اليوم الي تزوج فيه نهاااااااية السالفه

    طبعا والله حاله ماأقول ألا الله يعيين .......
    ........................................................
    الله يسلمنا وانتم من هذا الكلام ويصلح لنا زوجاتنا قولوا أمين .
    ...............
    اخوكم/ابو نوره



  • حسام

    #2
    هاذي حال الدنيا و الحياه الزوجية مثل المزرعه البكر اللي اول ما تشتريها ارضيتها نظيفه و شوي شوي وانت تحفر آبار و بعدين تحط الشبوك و بعدين تجيب عمال و أدوات و تنفق عليها
    حتى تزرعها و تنميها و يصير همك منها و المزرعة بحاجة اليك و بعدين تطلع اشجار مفيده و غير مفيده
    و تبيع المحصول و هو يادوب يكفي ثمن الكراتين اللي تعبي فيها المنتوج
    و بعدين تشعر انك ندمان انك شريتها من الاساس لان ظروفك ما تساعد انك تعطيها كل اللي تبي
    و تشوف الاشواك اللي فيها وتعب النهار و الشمس و طلبات العمال
    و في الحقيقة الله يعين الزوجات على البزارين و الحمل و الطبخ و النفخ اعذروهم

    و تعب الزوج لان الزوج يبي كل شي في اي و قت فهمتني

    مع تحياتي للجميعلل

    تعليق

    • الما سحينا
      عضو
      • Jun 2001
      • 65

      #3
      لله في خلقه شئون

      سبحـــان مـــــن يغير ولا يتغير

      تحياتي للأخ حسام]
      آخر تعديل تم من قبل الما سحينا; 09-11-2001, 03:36 PM.

      تعليق

      • الكناني
        مشرف سابق
        • Oct 2001
        • 1204

        #4
        اي والله الله يعين الزوجاتعلى ازواجهم .. الي مايراعونهم.. وعلى قولك يبون اي شي في اي وقت ..

        تعليق

        • الجنوبي
          عضو نشيط
          • Aug 2001
          • 469

          #5
          ابو نوره الله ساتر عليك وش له تعلم على نفسك

          عزيزي ابو نوره تحيه طيبه وبعد
          مشاركه رائعه وياريت تكمل المشوار اقصد فكر في الخمسين سنه زواج بعد مايبدا التخريف بين المعاريس وش لون تصبح الحاله يالله حسن الختام عموما اسال الله لنا ولكم الهدايه وان تستمر الحياة الزوجيه بعيدا عن النكد محفوفة بالعطف والرحمه

          تعليق

          • عامر
            عضو مؤسس ومميز
            • Jun 2001
            • 2801

            #6


            <h1>
            ابو نورة
            مشاركة ظريفة وحلوة : بس صدقوني هو من الانسان ذاته وحسب تعامله مع زوجته وحسب تجانس الود والتفاهم بين الزوجين سواء مر شهر والا عشر سنوات والا خمسين . لكن الله الهادي . ولا يكن نظريتكم على النساء جميعا ايضا يتحمل الزوج اكثر التفكك أو عدم التفاهم ليس شرطا العيب في النساء .... وسلامتكم .


            </TD></TR></TABLE>

            تعليق

            Previously entered content was automatically saved. Restore or Discard.
            حفظ تلقائي
            Insert: Thumbnail صغير وسط كبير Fullsize Remove  
            or Allowed Filetypes: jpg, jpeg, png, gif, webp

            ماهو اسم المنتدى؟ (الجواب هو الديرة)

            Working...